كتابي المستقبلي (اضبيب اسامة)

بيـــت الجد (( بو جبر ))

الأب : محـــمد .. إنسان متــــفهم يعشق بناتهـ أكـــثر من أولادهـ بعكـس
زوجتهـ أم جبر .. صاحـــب شركات كبيره .. عنده خير ماشاء الله ..
الأم
: سارا .. أم جبر .. مثل ماقلنا تحب أولادها أكـثر من بناتهـــا عكس
زوجهـا .. إنسانه متسلطه .. كلمتها على زوجها .. حنانه .. وأحـــيانا تكون
خـــبيثه بس هذا مايمنع إن قلبها يكون طيب ..
عندهم 3 أولاد وبنتـــــين
الأولاد ..
جبر : الكـــبير عمرهـ 33 .. دارس هندسه في لندن .. شوي متفتح بحكم دراسته
برى .. يشغل بشركه قطر للبترول .. طيب لأبعد درجه .. بس لو عصب .. ياويل
ويلك منه .. مو متزوج ..
جاسم : الوسطي ..عمره 28 .. متزوج عايشه
وعندهم ولدين عبدالعزيز وخالد .. هذا جاسم القلب الحنون مسمينه ..الكل
يشكي له من مشاكله..صايرلي فيها إنه اخصائي اجتماعي .. هو دارس حاسب
بجامعه قطر ويشتغل بالخارجيه .. يشغل منصب مهم بالدوله (( مو صدق لا
تصدقون )) .. يحب مرته لحــد الجنون .. مآخذها عن حب محد كان رآضي
بهالزواج .. لكن بعد ماتزوجوا الكل حبها ..
خـــالد : الإبن المدلل ذو
الـ18 ربـــيع .. لكنهـ جميل .. ماجآب نسبهـ بالثانـــويهـ وعشان كذي على
طول إشتغل .. رآعي بنات درجهـ أولى .. وجماله مساعده انه يكون بهالصفات ..
بالرغم من صغر سنه ..
هيا : الثانيه .. عمرها 30 .. متزوجه بس الله
مارزقها بعيآل .. لكن الحمدلله عايشهـ عيشه حلوه مع زوجها .. هيا ماشاء
الله مثقفه .. دارسه قانون بجامعه قطر وكملت الماجتسير والدكتوراه في
الامارات بحكم ان زوجها كان يدرس هناك فقررت انها تكمل بما انها قاعده
هناك بلا شغل ولا مشغله ..
الجوهره : عمرها 21 .. مزعجه هالبنت .. كل
شي تبيه .. مايهمها بالحياه غير لبسها وكشختها .. وبالدراسه زينه .. يعني
مو مطنشه دراستها .. حلــوه موت .. لكن فيها غرور .. اللي يقهر اغلب بنات
عيلتها .. والسبب اللي مخلي بنات عمها يرفضون ياخذونها لاخوهم دام ان
اخوهم يحبها ..

بيت اخو بو جبر (( بو خالد )) بيت الحلوين على قولهم ..
الأب : عبدالعزيز ( بوخالد ) إنسان محد مثله .. في طيبه وكرمه وأخلاقه ..
يحب الخير للناس .. محب لعياله .. له هيبه بالمجتمع .. ذو مركز مرموق ..
ويعاون أخوه بو جبر في شركاته .. على كبر سنه .. لكنه من أجمل ماخلق ربي
.. العين الوسيعه والانف الحاد والطول اللي ما مثله طول ..
الام :
منيره ( ام خالد ) إنسانه على نياتها .. سبحان الله يقولون الطيور على
اشكالها تقع .. طبعها نفس طبع زوجها .. جميله مثل زوجها .. حتى وهي لابسه
البطوله الكل مستخف عليها .. حنونه على عيالها محبه لزوجها وعيالها ..
عندهم 5 اولاد وبنت وحده ..
الاولاد ..
خالد : 34 سنه .. متزوج وحده لبنانيه .. عنده 6 عيال .. 3 بنات و3 اولاد
.. وكل واحد يقول الزود عندي .. طالعين على ابوهم بالجمال .. بس بالشقار
على امهم .. خالد طويل له عارض يذبح لو شفته بعيونه تتمنى تشوفه الدهر كله
وماراح تمل .. وله هيبه مثل ابوه .. يشتغل بالجيش .. وهذا الشي اللي خلى
خالد عصبي بأغلب الاحيان .. لكنه يظل طيب على امه وابوه .. بس مشكله خالد
على انه متزوج ويحب عياله .. عينه زايغه ويكلم بنات ..
محمد : 29 سنه
.. صديق ولد عمه جاسم الروح بالروح .. لكنه عايش بأمريكا .. يدرس هناك ..
بس عاجبه الوضع ومو راضي يرجع البلاد .. وكل ماينجح يطمح للأعلى من
الشهادات .. مو عشان شي .. بس عشان يتم زياده هناك .. ومحمد حالته النفسيه
تعبانه حيل .. راح نعرف من خلال الاحداث اسباب حالة محمد النفسيه ..
علي : 25 سنه .. طايش بمعنى الكلمه .. وجميل بمعنى الكلمه .. جميل العيله
على قولتهم .. كان من احلى شباب العيله .. وكل البنات يتمنونه .. لكنه
مايحب البنات خير شر .. كل همه بالحياه التفحيط والسيارات .. طبعا تعرفون
وين كله طايح ..!! بنعرف خلال القصه ..
عبدالله : 20 سنه .. عالمه غير
عن عالمنا .. هدفه بالحياه .. ينال اكبر واعلى شهاده .. مو نفس حال شبابنا
اللي همهم السيارات او الكشخه او البنات .. لا هذا دراسته اهم شي بالوجود
.. حلو هالشي .. لكن احيانا حس انه هالشي ماصخ .. وتحسه معقد .. عبدالله
طيووب .. وحبووب .. وعلاقته الاجتماعيه وايد اوكي .. يعرف هل الدوحه كلهم
.. وتراكم تعرفونه .. هههههاي امزح ..
عبدالرحمن : 18 سنه .. هذا رفيج
خالد .. ودوم معاه .. ونفس الاطباع .. بس الفرق من بينهم .. ان عبدالرحمن
شاطر على شطانته .. بعكس خالد .. وهذا الشي ساعه عبدالرحمن انه يجيب نسبه
ويدرس بالجامعه .. ودخل جامعه جورج تاون الموجوده بالمدينه التعليميه ..
وصارت معاه احداث كثيره بالجامعه .. خلت عبدالرحمن الشيطان يعقل ..
نجي للبنات اللي اصلا هي بنت وحده ..
نـــوف : 20 سنه .. جمالها يطير العقل .. ماخذه من ملامح ابوها .. عيونها
واسعه .. والخشم سله السيف .. والجسم ولا رولا سعد والشعر اللي من نعومته
ماتحس انه فيه شعر .. يعني بالعربي .. ملكه جمال .. وغرورها زايد عن حده
.. ماتنلام هالجمال وماراح تكون مغروره .. واللي زاد غرورها انها مرافجه
الجوهره بنت عمها .. وهي معاها بالجامعه ( جامعه قطر ) تخصص حاسب ..

العيله المهمه الثانيه بالقصه ..

عيله (( بوسلطان ))
الأب : ناصر ( بوسلطان ) إنسان خبيث .. وشراني .. طماع بالفلوس .. دام ان الله معطيه خير .. لكنه يحب يحط ايده على كل شي ..
الام : فاطمه ( ام سلطان ) صفاتها مالها خص بزوجها .. طيبه مووت .. حاولت تغير زوجها ماقدرت .. واللي مصبرها عليه عيالهم ..
عندهم ولدين وبنتين ..
الاولاد ..
سلطان : 32 سنه .. متزوج وعنده ولد واحد .. سلطان حلو .. بس صفاته مشينته .. مثل طبع ابوه .. لكنه راح يندم انه خذا صفات أبوه ..!!
فيصل : 22 سنه هههههههههههههاي .. هالانسان يضحك .. مستحيل يقول كلمه وهو
جدي .. فرفوووش لأبعد حدود .. وهذا اللي يقهر أبوه .. ابوه وده فيصل يصير
جامد وقاسي مع الكل .. بس فيصل مو طايع .. هذا طبعه اللي خلقه ربه فيه ومو
قادر يغير من نفسه ..
دلال : 20 سنه .. مآخذه طبع أبوها وأخوها سلطان .. ماتحب أحد بهالدنيا .. نفسها وبس .. تتوقعــون فيه شي بيغير من طبعهـا ..!!
ميرا : 17 سنه .. ياحليلها هالبنوته .. اموووره ومافي مثلها .. طبعا مو من
طبع ابوها واخوها سلطان واختها دلال .. بالعكس هالبنت بحالها وعلى
نياتهــا .. وايد مع رفيجتها ريم .. وراح نعرف اكثر عنهم من خلال الاحداث
..

..

والحين بنبدأ بأول جزء للروايه ..

(( الجزء الاول ))
الفصــل الاول ..

يوم الخميس في منطقه المعموره بالتحديد ..
في قصر بوخالد ..
على جنب بالحوش ..فيه حديقه من اروع مايكون ..
فيه شلال وقعده خشبيه ساحره ..

أم خالد : قلتلج مافي يعني مافي ..
نوف : يماااااا انا ابي اروح ..
ام خالد : صدعتي راسي بحنتج ..
نوف : انزين وافقي عشان مااحن زياده ..
ام خالد تطالعها بنص عين : شفتي الكوب اللي على الطاوله ..!
نوف : اي يمه وشحلاته يهبل شفيييييييه .؟
ام خالد : اذا ماقمتي من جدامي الحين راح اخليه بصمه بويهج ..
نوف : افااا يمه وهالجمال بيروح وبينمحي من على وجه الارض .. حرام عليج للحين ماتزوجت ..
ام خالد : فاااااااااااااااااااااااااارقي ..
نوف تقوم من مكانها : يمـه طبله اذني الله يسامحج .. خلاص بفارق ..
وتروح نوف صوب باب الصاله عشان تدخل .. بس تهون وترجع لامها ..
وتروح لاها وتبوس راسها وايدينها ..
نوف : يمه يعني مابتخليني اروح ..
ام خالد : لا يعني لا ..
نوف : طيب عللي ..!
ام خالد : حلوه عللي ..
نوف : لا جد وش السبب ..!!
ام خالد : هههههه قاعدين بمدرسه .. عللي و وش السبب ..
نوف : يمه ليش ماتبيني اروح ؟
ام خالد : لانه عيد ميلاد .. والعيد ميلاد حرام ..
" ام خالد كانت شوي متدينه "
نوف : يمه عاد كلهم بيروحون يرضيج انا مااروح ..
ام خالد : وش يعني .. عادي ..
نوف : تدرين وش يعني الحفله من دوني ..
ام خالد تطالع باستغراب : وش يعني ؟
نوف : راح يحسون بملل مو طبيعي وضيقه وكآبه وعياده الامراض النفسيه عندهم زحمه ومو فاضيين يستقبلون اعداد جديده من المرضى ..
ام خالد : تنكــتين طال عمرج ..
نوف : لايمه هذي الحقيقه ..
ام خالد : ............ << ساكته ماودها تعلق ..
نوف : يمه لــــــــــيش مااروح ..
ام خالد : ياليل .. ماادري لين متى انتي بتمين تحنين ..
نوف : يمه هذا وانا بنت وحده ومو مدلعيني .. شلون لو كنا 20 بنت ..
ام خالد : كل هذا ومو مدلعينج .. انتي صج مايملي عينج شي ..
نوف : يمـــــــــــــــه عااااااااااااد ..
ام خالد : شوفي حبيبتي ................ وبدت ام خالد تعطي النصايح لنوف اللي هي من طبعها ماتحب احد ينصحها بشي ..
احم احم ..
صوت واحد يتحنحن ..
إلا ويلتفتـــون نوف وأمها ..
إلا عبدالله جاي ..
عبدالله وهو يبوس راس امها : هلا بالغاليه اخبارج عساج طيبه ..؟
ام خالد : هلا بضناي تمام فديت روحك وانت اخبارك .؟ بشرنا عنك ..
عبدالله : بخير يامال الخير دام اشوف هالويوه ..
نوف : احم احم ..
يلتفت عليها عبدالله : حد كلمج انتي ؟
نوف : توك تقول هالويوه .. إلا لو إنت تقصد أمي أم ويهين هذا شي ثاني ..
ام خالد : انا ام ويهين ياللي ماتستحين ..
نوف : يمه هو قال انا شيخصني ..
عبدالله : نوفو شفتي هالكوب اللي على الطاوله .. لاتخليني افلعه بويهج واخليج فوق ماانتي شينه تصيرين اشين ..
نوف : عبود الحين انا شينه ..
عبدالله يبطل عيونه : من عبووووود ؟؟ أصغر عيالج ..
نوف : لا مو اصغر عيالي .. بس انت مااقدر اعاملك لا معامله الصغير ولا الكبير " ترى عبدالله ونوف توأم "
عبدالله : غصب عنج تحترميني وتعامليني معامله الاكبر منج .. انا ريال مو ياهل عندج ..
نوف : ان شاء الله عبووودي ..
عبدالله : عبووودي بعينج .. يالله دشي داخل وفكيني شوي ابي اقعد مع الغاليه ..
نوف : اوكي بقوم .. بس بالأول أبيك بكلمه راس ..
ام خالد : عيب وش كلمه راس .. استحي على ويهج ماتشوفيني قاعده .. مابقى إلا تقولين يمه قلبي ويهج ..
نوف : لالالا حشا يمه ..
عبدالله : قولي بصوت عالي وخلصيني ..
نوف تقرب من عبدالله وتقوله شي بإذنه ..
وعبدالله يلتفت لأمه : يمه ليش مو راضيه نوفو تروح بيت عمي ..؟
ام خالد : لانها تبي تروح لعيد ميلاد جوجو .. والعيد ميلاد حرام ..
عبدالله : صدقتي يمه .. خلاص نوفو مافي روحه دام هذي السالفه .. وبعدين هذي جوجو ماتستحي مسويه حفله على بالها توها بالروضه ..
نوف : عادي شفيها .. لو انا تخلوني جان من زمان مسويه ..
ام خالد : حامض على بوزج ..
نوف شوي حطت بخاطرها : خلاص انا بدخل داخل ..
عبدالله : الله معاج يالشينه ..
نوف أكتف بنظره لعبدالله ومشت ..
عبدالله : خفـــي علينا .. ترى مانستحمل هالنظره ..

في الجهه الثانيه .. في بيت بو سلطان ..
دلال بغرفتها ..
وتتكلم بصوت واااطي عشان محد يسمعها ..
(( تكلم منصور رفيجها الاماراتي .. هو يحبها ويموت فيها .. بس طبعا هي تلعب عليه وعندها بدال الواحد مليون ))
دلال : لالالالا حبيبي والله مااقدر ..
منصور ليش ياغناتي ماترومين .
دلال : توني مسويه لي تنظيف بشره ومااقدر اطلع بالجو بشرتي راح تخترب وتتوصخ ..
منصور : أوكي يعني متى نروم نشوف بعض ؟
دلال : بعد يومين ..
منصور : خــــــــــــيبه .. بعد يومين .. انا صارلي 4 ايام جاي من الامارات وكل يوم تقولين لي بكره ..
دلال : يعني شسوي اطلع واخرب بشرتي ..!!
منصور : خلاص برايج حبي .. بعد بكره بعد بكره ..
دلال : اقوول ميمووو ..
منصور : ياعيون ميمو ..
دلال : شريت لي الساعه اللي قلتلك عنها ولا نسيت ..!!
منصور : وانا اروم انسى ..! لا فديتج شريتها ابشرج ..
دلال : مشكور وماقصرت حبي ..
منصور : عشان هالكلمه أبيع الدنيا والله ..
دلال تضحك بدلع : هههههههههههاي ..
منصور : لالالا اليـــوم أنا بمووت ..
دلال : اسم الله عليك لــيش شفيك ؟
منصور : وشلون تبيني اعيش وانا اسمع هالدلع .. ياناااااااااااااااس مارووووووووووووم ..

وفـــي بيـت بوجبر ..
الجوهره : من صججججججججججججججج ؟؟
نوف : إي والله مارضت ..
الجوهره : حراااااااااام عليهااااااااااااا ليش مارضت ..؟
نوف : على قولتهــا عيل ميلاد ..
الجوهره : وإنـــتي ليش قلتــيلها إن عيد ميلاد ..
نوف : امج يالحلوه قالت لها ..
الجوهره : الله يهديهــا ..
نوف : انزين من بيجي ..؟
الجوهره : بنات عمي .. وربعي منور ومريوم وعليوو ودانوو ..
نوف : لا عاااااااااااد لاتعورين قلبي ..
الجوهره زعلت شوي بس ماحبت تبين : اسم الله على قلبج حبي ان شاء الله الجايات اكثر ..
نوف : إن شاء الله .. إي تعالي ماقلتلج عبود شقال يوم سمع انج مسويه عيدميلادج ..
الجوهره : شقال بعد ..!!
نوف : قال ليكون على بالها انها بالروضه للحين ..
الجوهره : ياكرهي لأينيشتاين أخوج ..
نوف : حدج عاد ..
الجوهره : وي كلش شبتسوين بتمحيني من الوجود ..؟
نوف : ههههههههههههههههه لا وين .. عقب من لي بهالدنيا ..!!
الجوهره : جب عاد لا تصيحيني ..
نوف : يالرقيقه انتي ..
الجوهره : انزين خلاص انا بروح بسوي شعري وبلبس ..
نوف : اوكي خذي راحتج وسلميلي على الربع ..
الجوهره : يوووصل .. والله بنفتقدج ..
نوف بنبره حزن : باي ..
الجوهره : باي

إنـــتظروني Smile

..

"
/
"
كل التحــيه ..

» ملف حلويات الشيف اسامة